ILOILO – Wala nahadlok si anay Health Secretary kag subong Iloilo 1st District Representative Janette Garin nga atubangon ang panibag-o nga kaso nga gin-indict sa iya sang Department of Justice (DOH).
Sa interview sang Bombo Radyo kay Garin, iya ginpahayag nga isa ka ‘recycled case’ ang Reckless Imprudence Resulting to Homicide nga ginpasaka sang nasambit nga pamunuan sa iya kag siyam ka iban pa halin sa Department of Health (DOH), Food and Drug Administration (FDA), Research Institute for Tropical Medicine, kag drug maker nga Sanofi Pasteur bangud sa kontrobersyal nga anti-dengue vaccine Dengvaxia.
Suno kay Garin, wala siya sang ginatago kaangot sa amo nga gingamit nga bulong kag bisan ang siyensya suno sa iya ang makapamatuod nga indi dengue vaccine dengvaxia ang kabangdanan sang kamatayon sang mga kabataan sang 2018.
Pahayag pa ni Garin, santo sa medical records sang mga ospital sa diin gin-admit ang mga kabataan, ang rason sang ila kamatayon amo ang ruptured appendicitis, amoeba, dehydration, cancer, tumor, dehydration, cancer, tumor, lupus, human immunodeficiency virus ukon HIV, kag leptospirosis.
Suno kay Garin, sulit-sulit na ang ginahimo sang DOJ sa diin, kun basehan ang nauna nga mga hearing sa pito ka mga korte, wala man sang napresenta nga legal nga basehan ang state prosecutors.
Pahayag pa sang opisyal, nagabase lang sa peke nga balita ang mga opisyal sang DOJ.
Sa bahin naman sang Public Attorney’s Office (PAO), ginpahayag ni Garin nga ginkuhaan na sila sang otoridad nga gamiton ang ila pondo sa ‘wala-untat’ nga pagpasaka sang kaangay nga kaso apisar wala man ini sang ginapadulungan.
Sa subong, nagalaum si Garin nga liwat nga madismiss ang kaso.
