Nagpanawagan ang mga foreign minister sang Association of Southeast Asian Nations ukon ASEAN nga untaton na ang pagpang-atake sa Middle East kag likawan na ang bisan ano nga tikang nga mahimo makadugang sa tension.
Ginhingyo man sang mga lideres nga tumanon na ang ceasefire.
Sa ginpatigayon nga ASEAN SUMMIT, nagpanawagan ang mga lider sang kalinong sa Middle East bangud sang nagalala nga tensyon sa tunga sang US, Israel, kag Iran, nga gin-intrahan man sang Hezbollah.
Suno naman kay President Ferdinand Marcos Jr. nga amo ang ASEAN 2026 chairman, mabudlay makakita sang long-term solution samtang padayon ang mga pagpamomba kag inaway sa rehiyon.
Ginpunto man sang ASEAN ang importansya sang pagpabilin nga bukas kag luwas sang Strait of Hormuz, nga isa ka importante nga alagyan sang mga barko nga nagadala sang langis kag iban pa nga produkto sa bug-os nga kalibutan.
Sa ila joint statement, nagpahayag sang daku nga kabalaka ang mga lider sang ASEAN bangud posible nga maapektuhan sang kinagamo ang kalibutan, ang komersyo sini, kag amo man ang suplay sang enerhiya.
