ILOILO CITY – Nagtanyag sang bulig si Albay Representative Joey Salceda kay Tourism Secretary Christina Frasco kadungan sang kontrobersiya may kaangtanan sa “Love the Philippines” campaign.
Una na nga ginmuno ni Salceda ang Department of Tourism bangud sa indi paglakip sa kilala nga Mayon Volcano sa tourism video.
Suno sa iya, indi niya pag-ipanawagan nga mag-resign si Frasco.
Dugang pa sang natungdan, ginpahayag niya kay Frasco nga pahalinon ang consultant nga ginpati man sang tiglikom, tadlungon ang mga sala kag imbestigaran ang natabo, mangin inclusive sa mga gina-feature nga destinasyon nga ginpati man sang tourism secretary.
Nagpanawagan man ini sa publiko nga buligan si Frasco.
Ginpasiguro man niya nga magabulig ang Albay kag ihatag niya ang iya mga personal experience bilang anay gobernador sang Albay.
Suno pa kay Salceda, sa idalom sang iya pagpangalagad bilang gobernador, ang foreign tourist arrivals sa probinsya ang nagsaka sang 4,700%.
Antes ang pandemya, ang Albay ang may yara sang 1.32 tourists per resident nga mas mataas sa 0.57 per resident nationally.
Kung madumduman, gin-ulan sang pagpakamalaut ang Department of Tourism bangud sa audiovisual presentation sa “Love the Philippines” tourism campaign nga nag-feature sang non-original stock footage.
Ang advertising firm nga Doyle Dane Bernbach Philippines ukon DDB Philippines nga amo ang sa likod sang bag-o nga tourism campaign ang una na nga nagpangayo sang pasaylo bangud sa insidente.
Pahayag sang Department of Tourism, utdon na nila ang kontrata sa nasambit nga firm kag ginklaro nga wala sang naggwa nga public funds para sa trabaho sang DDB Philippines.
