Nagdamo ang numero sang mga tawo nga nag-inom sang alcoholic drinks sa tion sang pandemya.
Suno kay Stefano Scarpetta, director for employment, labor and social affairs sa Organization for Economic Cooperation and Development, sa ila ginpatigayon nga survey sa 11 ka mga pungsod sa kalibutan sa sulod sang pito ka semana humalin sang Mayo tubtub Hunyo 2020, nagwa nga 43 sa 60,000 ka mga indibidwal ang nag-inom sang doble kun ipaanggid sa first wave sang COVID-19.
26 percent naman ang talagsa lang nag-inom kag 31 percent ang wala sang pagbag-o.
Suno kay Scarpetta, ang baligya-anay sang alcoholic drinks sa mga restaurant kag bars sa kalibutan ang nagnubo, apang ang mga naga-inom sa ila tagsa ka mga balay ang nagdamo.
Nagapati si Scarpetta nga ang pagtaas sang alcohol consumption ang posible epekto sang stress nga nabatyagan sang kada indibidwal subong nga pandemya.
“Lockdown and stay at home orders exacerbated some of the negative behaviors associated with harmful alcohol consumption,” pahayag ni Scarpetta.
Nagtaas naman ang tax revenue sa baligya-anay sang alcohol drinks sa 3 tubtub 5 percent sang nagligad nga tuig kun ipaanggid sang 2019 sa mga pungsod kaangay sang Britain, United States kag Germany.
Sa survey, nagwa nga 80 percent ang naga-inom sang wine ukon 1.5 liters sang beer kada okasyon.
“It is difficult to know whether these changes will continue when living conditions go back to normality, but the experience of previous crises suggests that we may see an increase in problematic drinking in the medium term.”
Ang nasambit nga data ang ginkuha sa 10 ka mga pungsod nga myembro sang Organization for Economic Cooperation and Development kaangay sang Australia, Austria, France, Germany, Ireland, the Netherlands, New Zealand, Switzerland, Britain and the United States — kag Brazil, nga indi myembro sang organisasyon.
