Ginpalawig pa ang Alert Level 3 sa syudad kag probinsya sang Iloilo amo man ang probinsya sang Guimaras.
Ginkumpirma ini ni Acting Presidential Spokesperson Karlo Alexi Nograles kasunod sang ginpatigayon nga pagsinapol sang Inter-Agency Task Force for the Management of Emerging Infectious Diseases.
Magalawig ang Alert Level 3 status sa nasambit nga mga lugar tubtub sa Pebrero 28.
Sa idalom sang Alert Level 3, pila ka mga establishments ang ginapahanugutan nga mag-operate sa 30% indoor venue capacity apang exclusively para sa fully vaccinated nga mga indibidwal kag 50% outdoor venue capacity sa kondisyon nga fully vaccinated ang mga empleyado.
Sa probinsya sang Iloilo, ginpahayag ni Iloilo Governor Arthur Defensor, Jr. nga manageable pa ang healthcare utlization rate kag paagi sa sini nga alert level, malikawan ang pagsaka sang numero sang mga pasyente.
As of February 14, ang numero sang mga indibidwal sa Iloilo Province nga nakabaton sang complete dose sang Covid-19 vaccine ang yara na sa 72 percent sang kabug-usan nga populasyon.
ILOILO CITY
Magaapelar naman ang Iloilo City Government sa Inter-Agency Task Force for the Management of Emerging Infectious Diseases agud nga pamatukan ang pagpalawig sang alert level three sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginapreparar na sang legal team ang pormal nga appeal agud nga mapasa sa IATF.
Suno sa alkalde, naganubo na ang kaso sa nagligad nga duha ka semana.
Ang mga pasyente sa mga ospital sa syudad ang nagikan man sa mga lugar sa guwa sang syudad.
Suno pa kay Mayor Treñas, kinahanglan na nga ma-deescalate ang alert level sang syudad agud nga mabuksan ang ekonomiya kag makahatag sang dugang nga trabaho sa mga residente.
GUIMARAS
Sa probinsya sang Guimaras, magasapol naman ang mga local officials agud maistoryahan kun ano ang masunod nga plano kasunod sang anunsyo nga palawigon ang alert level 3 status.
Sa interview sang Bombo Radyo kay Guimaras Vice Governor Atty. John Edward Gando, iya ginpahayag nga indi naman makaalarma ang healthcare utilization rate sa probinsya.
Kalabanan sa mga pasyente ang yara lang sa mild tubtub sa moderate.
Suno kay Gando, 100-plus na lang ang numero sang active cases sang Covid-19 sa Guimaras kag nagapadayon man ang Covid-19 vaccination sa general population.
Ginpahayag man sang bise-gobernador nga ginasuspinder subong ang leisure travels sa probinsya apang ginapasugtan ang mga byahe nga may yara na sang reservation sa mga establisemento.
Ang contact sports ang suspended man sa idalom sang existing executive order ni Guimaras Governor Samuel Gumarin.
