Nagtapos na ang kampanya sang Pinay tennis star nga si Alex Eala sa Dubai Tennis Championships matapos nalutos sa quarterfinals sa kamot sang world no. 4 nga si Coco Gauff, 6-0, 6-2.
Apisar sang matunog nga suporta sang Pinoy tennis fans sa Center Court, ginbudlayan ang 20-anyos nga rising star nga makakuha sang momentum batok sa two-time Grand Slam champion nga American player.
Sa imbukada pa lamang nga set, wala na nag-uyang sang tyempo si Gauff kag ginpaulan ang 26 points batok sa 11 nga nahimo ni Eala.
Ginpasagunsunan pa sini sang puntos sa second set, 4-0, tubtub nga nakapuntos na gid man si Eala nga amo ang nagbuhi sang paglaum sang fans matapos ang 53 minutos sini sa court.
Apisar nagka-problema si Gauff sa service, tuman naman ka ulihi para kay Eala nga maka-recover.
Gintawag naman ni Gauff nga “home crowd” ang nagsuporta kay Eala bangud sa tuman ka damo nga Pinoy nga nagpungko sa venue. Gin-engganyo sini ang fans nga magpadayon sa pagsuporta sa Filipina player.
“I’d like to thank Alex for bringing a new demographic to the sport. I really appreciate. I think it’s great. I know sometimes, it’s tough when you are playing against a home crowd, but I think that it’s great for the sports so keep being enthusiastic and keep rooting for your player,” mensahe ni Gauff pagkatapos sang hampang nga ginpalakpakan naman sang Filipino fans.
Abante na si Gauff sa semifinals kun sa diin posible nga atubangon sini si world no. 67 Antonia Ruzic ukon si world No. 9 Elina Svitolina.
Ang Dubai Tennis Championships amo ang ikaanum nga tournament ni Eala subong nga tuig. Nagapang-47 subong ang Pinay tennis ace sa world rankings. Nakuha sini ang iya isahanon nga WTA 125 crown sa Guadalajara sa Mexico sang nagligad nga tuig.#
