Gindeklarar nga guilty sang Sandiganbayan si anay Kongresista kag subong alkalde sang Muntinlupa nga si Ruffy Biazon sa kaso nga graft, may kaangtanan sa ginatudlo nga indi insakto nga paggamit sang P1.95 milyon nga Priority Development Assistance Fund (PDAF) ukon kilala nga pork barrel scam.
Bilang resulta sang desisyon, ginsentensyahan si Biazon sang anom (6) tubtob napulo (10) ka tuig nga pagkapreso.
Apang, gin-abswelto naman siya sang korte sa kaso nga malversation nga may kahilabtanan man sa amo nga pork barrel issue.
Sa pihak nga bahin, ginpahayag sang alkalde nga mag-apela siya sa desisyon sang Sandiganbayan.
Suno kay Biazon, indi dapat nga madisturbo ukon madiskaril ang iya serbisyo sa publiko bangud sang isyu, kag padayon ang iya panindugan sa pagtamod sa mga Muntinlupeño.
Ginpasiguro man sang kampo ni Biazon nga indi ini makaapekto sa iya pagserbisyo bilang alkalde sa subong nga tion.
