Gintawag ni Senator Panfilo “Ping” Lacson nga mas malala pa sa pork barrel ang ginatawag nga “leadership fund” ukon “allocables.”
Kasunod ini sang hearing sa Sandiganbayan sang Miyerkules kun sa diin ginsiling ni former Public Works Secretary Manuel Bonoan nga nakabaton ang mga senador sang infrastructure allocations nga nagalab-ot sa isa ka bilyon ka pesos ang kada isa sa idalom sang ginatawag nga “leadership fund” sang panahon ni former Senate President si Senator Juan Miguel Zubiri.
Suno kay Lacson, dapat na untaton ang amo nga sistema bangud nagahatag ini sa mga mamalidha sang kahigayunan nga maimpluwensyahan ang national budget antes pa magsugod ang deliberasyon sang Kongreso.
“The Leadership Fund aka ‘allocables’ is a worse version of the outlawed pork barrel system,” suno sa senador. “With all that said, I maintain that such anomaly in the passage of the national budget must stop.”
Ginkumpirmar ni Lacson nga sang ginapreparar ang 2025 national budget, gintanyagan ang mga senador sang 500-milyon pesos nga Leadership Fund halin sa Department of Public Works and Highways (DPWH).
Suno sa iya, nalakip na ang mga allocation sa National Expenditure Program (NEP) nga ginapadala sang Executive Branch sa Kongreso.
Pahayag ni Lacson, indi dapat mangin kabahin ang mga mamalidha sa budget preparation bangud responsibilidad ini sang Executive Branch.
Suno sa iya, dapat sa authorization phase lamang magamit sang mga senador kag kongresista ang ila awtoridad, kun sa diin ginadiskusyonan kag ginadugangan ukon ginapaayo sang Kongreso ang proposed budget.
“[The Leadership Fund] added another layer that provided legislators opportunity to make budget insertions even during the Preparation Phase of the national budget, or before the National Expenditure Program (NEP) is transmitted to the Congress for deliberations by both chamber, where further insertions could still be introduced,” suno kay Lacson.
Nagpaandam si Lacson nga kon may nakatalana na nga pondo para sa mga mamalidha antes pa magsugod ang deliberasyon, mahimo ini ikumparar sa bag-o nga bersyon sang pork barrel system.
Ginkonekta ni Lacson ang paghimo sang ginapatihan nga Leadership Fund kanday anay DPWH Secretary Manuel Bonoan kag anay Undersecretary Catalina Cabral, kag nagsiling nga nagguwa ini sa 2025 budget.
Apang, suno sa senador, wala na ang amo nga allocation sa proposed 2026 national budget.
Una naman nga nagsiling ang Malacañang nga wala na sang amo nga pondo sa 2027.
“No leadership fund under 2027 budget. All projects proposed in the 2027 DPWH budget are based on the needs of the local and regional government. And if needed, secured clearance from the Regional Development Council to ensure that this benefits the people. Only projects that have completed the documentary requirements, such as plans and programs, are submitted to ensure compliance with DBM guidelines, so mahigpit po ang DBM,” suno kay Palace Press Officer Claire Castro.
“Kung nangyari po ito sa panahon noon, hindi po ito mangyayari sa ngayon,” dugang sini.#
