Ginkumpirma sang Anti-Money Laundering Council (AMLC) ang pila sa mga bank transaction ni Vice Pres. Sara Duterte nga nakasaad sa annexes sang sworn affidavit ni anay senador Antonio Trillanes IV.
Sa hearing sang House Committee on Justice, nagpili si Mamamayang Liberal Rep. Leila de Lima sang random entries agud ipamangkot kun yara man ini sa report sang AMLC.
Ginsiling naman ni AMLC Executive Director Ronel Buenaventura nga indi nila masapubliko kun paano ang proseso sang transfers kag kun dini ginpadala, apang masugid nila kun may natabo nga transfer sang pareho nga amount kag petsa, kag ini ang ginkumpormehan naman ni committee chair kag Batangas Rep. Gerville Luistro.
Yara tanan sa 18 ka mga transactions ang ginkumpirma sang AMLC nga yara sa ila record kag yara man sa affidavit ni Trillanes.
Ini nagalakip sang masunod:
– Entries gikan sa 71 transactions nga naga-involve sang Rodrigo–Sara Duterte joint account
– Entries gikan sa 47 transactions sa idalom sang Sara Duterte–Manases Carpio joint account
– Entries gikan sa 20-entry masterlist nga nagasakop sang mga accounts sang Duterte family
Suno kay Buenaventura, ang 18 ka mga selected entries ang nag-reflect sang actual nga fund movements, nga may amounts kag petsa nga nagasanto sa lista sa affidavit ni Trillanes.
Suno naman kay De Lima, importante ang verification bangud ang AMLC confirmation ang naga-establish nga natabo ang transactions kag nagsibo man ini sa ginpresentar nga mga detalye, partikular ang may kaangtanan sa alleged payouts nga naangot sa drug lord nga si Samuel “Sammy” Uy.
Tuman naman nga ginpasalamatan ni Trillanes nga matapos ang 10 ka tuig humalin sang ginpagwa niya ang amo nga impormasyon, may kumpirmasyon na gid man gikan sa Anti-Money Laundering Council ang tuhoy sa nasambit nga mga transaksyon ni Vice President Sara Duterte nga yara sa iya affidavit.
