Gin-acquit sang Sandiganbayan si anay Santa Barbara, Iloilo Mayor Isabelo Maquino kag lima ka iban pa sa kaso nga graft may kaangtanan sa ginaalegar ma-anomaliya nga bidding sang public works contracts sa nasambit nga banwa.
Ang iban nga acquitted amo ang mga myembro sang Municipal Bids and Awards Committee (BAC) nga sanday Lyndofer Beup, Noel Jaspe, kag Negenia Araneta; kag private defendants nga sanday Raymund Tabuga sang Topmost Development and Marketing Corporation (TMDC) kag Felix Gurrea sang F. Gurrea Construction Incorporated (FGCI).
Sa desisyon nga gin-issue sang Nobyembre 15, ginsiling sang Sandiganbayan Seventh Division nga wala nag-withdraw ang mga contractors sang bids para magpa-iway sa competitor, baliskad sa nangin interpretasyon sang prosecution.
Samtang depektuso naman ang mga kaso nga gin-file batuk sa mga contractors kag local government officials.
Nahibaluan nga sang 2017, nagpasaka ang Office of the Ombudsman sang mga kaso nga paglapas sa Anti-Graft and Corrupt Practices Act kag Government Procurement Reform Act batuk sa anay alkalde, mga myembro sang BAC kag duha ka mga contractors.
Ang lokal nga mga opisyal ang gin-akusaran sa paghatag sang pabor sa duha ka mga contractors sa pipila ka mga public works contracts sa Santa Barbara. Ang kaso ang gin-angot sa ginaalegar pag-atras sang isa sa mga kontraktor agud tugutan ang isa nga magdaug.
Agud masuportahan ang argumento, ginpresentar sang TMDC sa korte ang ila sulat sa BAC nga nagasiling “Please be informed that we are refraining from submitting our bid for the said project as our total cost exceeds the approved budget for the contract.”
Sa bahin naman sang FGCI, ginpresentar man nila ang sulat sa BAC nga nagasiling, “We regret to inform you that we opt to forego our opportunity to bid for the abovementioned project cause our cost estimate goes beyond the approved budget.”
Bangud sa mga gingamit nga termino kaangay sang “refrain” kag “forego”, nagapati ang Sandiganbayan nga wala napasa ang bids.
Ginpahayag man sang korte nga wala na sang iban nga firms nga nagpasa sang bids para sa mga proyekto kag bangud ang winning bids ang nakasulod man sa aprubado nga budget sang kontrata, wala sang overpayments ukon sobra nga paggasto sa mga proyekto.
