ILOILO CITY – Ginmanduan sang Korte Suprema ang anay spokesperson sang National Task Force to End Local Communist Armed Conflict nga si Lorraine Badoy nga maghatag sang komento may kaangtanan sa petition nga indirect contempt nga gin-file batuk sa iya bangud sa kontrobersyal nga Facebook post batuk sa isa ka judge.
Sa ginpagwa nga resolution sang Court en banc nga napetsahan sang Oktubre 11, ginhatagan sang Korte Suprema si Badoy sang “non-extendible period” nga 15 ka adlaw.
Nahibaluan nga subong nga bulan, nag-file sang petition ang grupo sang mga abogado kag law school deans bangud sa ginpagwa nga statement ni Badoy batuk sa Manila Regional Trial Court judge nga si Marlo Magdoza-Malagar.
Ini ang ginpamunuan ni former Philippine Bar Association head Rico Domingo kag Ateneo Human Rights Center executive director Ray Paolo Santiago kag gin-updan sang mga supporters nagikan sa nagkalain-lain nga mga progressive groups.
Ang iban pa nga mga petitioners ang ginalakipan nanday former Dean Antonio La Viña kag law school deans Soledad Deriquito-Mawis, Anna Maria Abad kag Rodel Taton.
Ini ang nag-ugat sa desisyon ni Malagar nga nagabasura sang petition sang gobyerno nga ideklarar ang Communist Party of the Philippines kag New People’s Army bilang mga terorista.
Ang indirect contempt ang may penalidad nga multa tubtob sa P30,000 ukon pagkapreso tubtob sa anum ka bulan ukon mahimo nga multa kag pagkapreso.
Ginpanginwala naman ni Badoy nga ginpahog sini si Malagar kag nag-post lamang ini sang hypothetical syllogism agud nga mapakita ang iya nga punto.
Magluwas nga anay spokesperson sang National Task Force to End Local Communist Armed Conflict, si Badoy ang nangin undersecretary sang Presidential Communications Operations Office sa idalom sang administrasyon ni anay Presidente Rodrigo Duterte.
