Ginpasalig ni Education Secretary Sonny Angara nga tutukan sang ahensya ang mga isyu kaangot sa mass promotion sa mga kabataan.
Kasunod ini sang panawagan sang Second Congressional Commission on Education (EDCOM 2) nga tapnaon gilayon ini nga practice bangud nagaka-pressure lamang ang mga manunudlo nga papasaron ang indi man kwalipikado nga mga estudyante agud lamang nga malab-ot nila ang ila nga administrative performance targets.
Suno naman kay Angara, wala man sang partikular nga polisa sa mass promotion sa DepEd, apang nakahibalo siya nga may nakaandan nga buluhaton kaangay sang pag-tutor sang maestro kag maestra sa estudyante nga wala nakapasar.
Bangud sini suno sa tiglikom, ang tendency amo nga papasaron na lang ang bata.
Importante man suno kay Angara ang kolaborasyon sa Simbahan kag gobyerno para sa reporma sa edukasyon.
Ginhalimbawa sini ang pag-partner sang DepEd sa nationwide network sang Caritas Philippines sa 86 diocesan social action centers.
Bangud sini nga partnership suno sa iya, nag-uswag ang dalagku nga mga programa kaangay sang school-based feeding, learning recovery initiatives, kag Alternative Learning System.
Kun balikan, sa Comprehensive Rapid Literacy Assessment sa school year 2024-2025, nabulgar nga 48.76 percent sang learners ang indi pa makahibalo magbasa sa Grade 3. Bisan nga 30.5 percent sang estudyante ang proficient sa amo sini nga level, amat-amat nga nagahina ang mastery samtang nagataas ang grade level tubtub nga nagasarurot na sa 0.40 percent sa Grade 12.
