ILOILO CITY – Ipatuman na subong nga adlaw ang Anti Modified Muffler Ordinance para sa mga motor nga may tuman ka gahod nga muffler.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga may yara na sila sang duha ka device nga pagagamiton sa pagpatuman sang nasambit nga ordinansa.
Suno kay Conlu, nagakadapat nga yara lang sa 115 per decibel ang kagahudon sang muffler sang isa ka motorsiklo kag kun maglapaw ini sa gintalana nga decibel, pagahatagan sang multa ang mga driver ukon tag-iya.
Ginpahayag ni Conlu nga P1,000 ang multa sa 1st offense, P3,000 sa 2nd offense samtang P5,000 kag kumpiskaron ang muffler sa ika tatlo nga offense.
Nagpalab-ot naman sang pagpasalamat ang natungdan kay Iloilo City Mayor Jerry Treñas bangud ang alkalde mismo ang personal nga nangita sang paagi agud may yara sang muffler devices ang Public Safety and Transportation Management Office.
