ANTIQUE – Nagalaum si Antique Gov. Rhodora Cadiao nga amat-amat na nga maanad ang mga pumuluyo sa ginatawag nga new normal kasunod sang pagpaidalom sa probinsya sa General Community Quarantine.
Sa interview sang Bombo Radyo kay Cadiao, iya ginpahayag nga ang 15 ka adlaw nga extension sa Enhanced Community Quarantine ang nagakahulugan sang tuman nga pag-antos ilabi na sa labor force sang probinsya.
Suno kay Cadiao, bangud nga yara na lang sa General Community Quarantine ang Antique, amat-amat na nga nagabukas ang mga magagmay nga negosyo.
Ginpahayag ni Cadiao nga apisar sang 11 ka kumpirmado nga kaso sang Coronavirus Disease 2019 (COVID-19) sa Antique, wala na ini naglapta bangud sa preventive measures nga ginapatuman sang tagsa ka Local Government Unit.
Ang mga pasyente nga nagpositibo sa COVID-19 suno sa gobernador ang naghalin sa iban nga lugar kag nagpauli lang sa Antique kag ang mga banwa lamang nga may kumpirmado nga kaso amo ang Caluya kag Pandan.
May kaangtanan diri, ginpasiguro naman sang natungdan nga padayon ang contact tracing sa mga naka angkon sang close contact sa COVID-19 patients.
