ILOILO CITY- Apat tanan ka mga schemes sa engineering solution sa Ungka Flyover ang iga-endorso sang Regional Development Council Region 6 sa Department of Public Works and Highways.
Ini matapos nga gin-adoptar sang nasambit nga council ang ikaapat nga scheme nga ginpresentar sang structural engineer nga si Engr. Nilo Jardeleza nga amo ang paggamit sang piled raft foundation gamit ang hydraulic static pile driver para sa engineering solution sa vertical displacement sa Ungka flyover.
Ini magluwas pa sa nauna nga schemes ng ginpresentar sang third party consultant nga Adam Abinales Engineering and Consultancy nga amo ang masunod: pagprovide sang dugang nga bored piles ilabi na sa piers 4, 5 kag 6; pag-provide sang portal frame agud suportahan ang existing Pre-Stressed Concrete girders; kag pag-underpin sang naga-eksister nga piers kag abutments nga nagalakip sang bored piles paagi sa intense jet grouting.
Sa interview sang Bombo Radyo kay Engr. Nilo Jardeleza, isa ka structural engineer, iya ginpahayag nga ang ginpresentar niya nga scheme ang makabig nga environmentally-friendly nga pile foundation equipment bangud wala ini naga-vibrate kag nagagahod, indi man iknahanglan nga kakson kag islan ang superstructure kag applicable ini sa tanan nga units sang pier sang flyover.
Suno kay Jardeleza, apisar wala pa sa Pilipinas ang amo nga equipment apang available na ini sa Indonesia kag nagabalor ini sang 300,000 US dollars ukon katumbas sang 16 million pesos.
Sa subong, ginatugyan nalang ni Jardeleza sa Department of Public Worksand Highways kun diin sa apat ka mga schemes ang pilion para sa pagkaayo sang amo nga istruktura.
Nahibaluan nga si Jardeleza ang miembro sang Infrastructure and Development Committee sang Regional Development Council 6 kun sa diin ang Chairman sang committee amo si Iloilo City Mayor Jerry Treñas.
