ILOILO CITY – Gin-freeze sang Anti-Money Laundering Council ang tanan nga assets ni suspended Negros Oriental Representative Arnolfo “Arnie” Teves Jr. matapos nga ini nga gin-designate nga terorista sang Anti-Terrorism Council.
Suno kay Anti-Money Laundering Council legal officer Luis Anthony Warren, sa tion nga i-designate ang isa ka indibidwal ukon organisasyon, magapagwa ang council sang ex parte order agud nga i-freeze without delay ang assets sang subject.
Si Teves kag ang 12 ka iban pa ang gin-tag bilang terorista bangud sa pila ka kaso sang gina-alegar pagpamatay kag pagpang-harass sa Negros Oriental.
Suno sa Anti-Terrorism Council, ang ila mga ginlapas ang ginalakipan sang terorismo; pagplano, paghanas kag pagpatigayon sang pagkomiter sang terorismo; pagpakigbahin sa isa ka terorista nga grupo kag pag-recruit sa iban pa; kag paghatag sang material support sa mga terorista.
Ang mamalidha ang ginatudlo mastermind sa kamatayon ni the late Negros Oriental Governor Roel Degamo sang Marso 4.
Si Degamo kag ang walo ka iban pa ang napatay samtang ang iban ang napilasan sa nasambit nga pagpang-atake. Ang death toll ang nagsaka sa 10.
Para sa Anti-Terrorism Council, ang serye sang pagpamatay kag harassment sa Negros Oriental nga naglab-ot sa assassination kay Degamo ang indi dapat pagkabigon nga isolated nga kaso sang violence.
Gin-enganyo naman sang Department of Justice si Teves nga atubangon ang mga alegasyon batuk sa iya pinaagi sa nagaka-igo nga lugar kag indi sa social media.
Suno kay Atty. Jose Dominic “Mico” Clavano IV, spokesperson sang ahensya, ang mga otoridad ang may impormasyon na sa kun sa diin si Teves.
Pahayag niya, si Teves ang indi pa makabig nga pugante apisar nga wala ini sa Pilipinas humalin sang Pebrero kag may terrorist tag.
Sa subong, wala sa gihapon sang warrant batuk sa iya.
Si Teves ang ginpahanugutan nga magpadulong sa Estados Unidos humalin sang Pebrero 28 tubtob Marso 9 para sa isa ka personal trip.
Una na nga ginpahayag ni Justice Secretary Jesus Crispin Remulla nga si Teves ang nagagwa nga mastermind sa kamatayon ni Degamo.
Humalin sadto, nagpamalibad si Teves nga magpauli sa Pilipinas bangud sa kabalaka sa iya seguridad.
Samtang, i-konsiderar sang House ethics panel ang designation sang Anti-Terrorism Council kay Negros Oriental Representative Arnolfo “Arnie” Teves Jr. bilang terorista sa proceedings sa kaso sang mamalidha.
Suno kay House Secretary General Reginald Velasco, Jr., padayon nga imbestigaran sang house committee si Teves.
Wala pa sang desisyon ang panel bangud nga may yara sang ginasunod nga due process.
Pahayag niya, may kopya na sila sang desisyon sang Anti Terrorism Council.
Ginpaathag ni Velasco nga madugay ang proceeding sa kaso ni Teves bangud nga madamo ang resource persons nga imbitado.
Ini ang ginalakipan sang mga opisyal nagikan sa Anti-Terrorism Council, sa Justice department, sa National Bureau of Investigation kag Department of Foreign Affairs.
