Sa baylo nga kalipay, nabutang pa sa peligro ang kabuhi sang isa ka residente sang Pal-agon, Pavia, Iloilo matapos naigo sang bala sa tunga sang selebrasyon sang Paskwa.
Ang biktima amo si AJ, 25, residente sang nasambit nga lugar.
Sa interview sang Bombo Radyo kay PLtCol Rolando Araño, spokesperson sang Iloilo Police Provincial Office, iya ginpahayag nga base sa imbestigasyon, yara sa gwa sang ila balay ang biktima kaupod ang iban nga myembro sang iya pamilya.
Sunod-sunod nga lupok ang ila nabatian kag gindumdom nila nga lunsay firecrackers lang ini apang hinali lang nga may nag-igo na sa tiil sang biktima kag nakit-an nga nagdugo.
Gilayon ini nga gindala sa ospital.
Sang nagresponde naman ang otoridad, naabtan nila sa lugar ang ginatudlo nga suspek na si alyas Dayon, 37-anyos, nga nag-ako man nga siya ang nagpalupok sang pusil.
Suno pa sa impormasyon, sa kada may maglupok nga libentador, nagabalos ang suspek paagi sa pagpalupok sang pusil.
Gilayon naman nga gin-aresto ang suspek kag mangatubang sang kaso nga Reckless imprudence resulting in physical injury kaangot sa RA 10591 ukon ang Comprehensive Firearms and Ammunition Regulation Act.
