Uso na subong nga may ginapa-liwat ukon mas ginapanami nga parte sa imo nga lawas.
Masami sa aton ginapa-retoke ang yara sa aton nga nawong… para mas guwapa ukon guwapo kita kag magataas ang aton nga confidence sa aton nga kaugalingon.
Wala gid ina sang problema… basta may yara ka lang sang kuwarta!
Apang, indi pwede nga himuon mo ang ginhimo sini nga babayi sa isa ka pribado nga ospital sa Turkey nga nagtuyo kuntani nga magpalagyo pagkatapos sang pagpaidalom sa plastic surgery bangud wala gali ini sang inugbayad sa operasyon!
Sang amo nga tion, nagasuksok pa ang babayi sang hospital robe kag puti nga tsinelas.
Indi kinaandan ang hitabo bangud nagabaisay sila sang mga doktor kag nurse kag ginapilit siya nga indi anay maglakat.
Nakuhaan man sang picture ang babayi nga nagapamanog pa ang iya nga nawong kag natabunan pa sang mga bandages nga buot silingon, bag-o lang ini nakatapos sa extensive plastic surgery.
Wala ginsapubliko ang pangalan kag nationality sang babayi, apang gin-report sang Turkish media nga hungod gid nga nagbyahe ang amo nga babayi sa Turkey bangud gusto sini nga magpaidalom sa cosmetic procedure.
Bangud mahal ang operasyon kag indi makaigu ang iya kuwarta, maga-mato-mato na lang kuntani sa paghalin ang babayi apang sa malain nga palad para sa iya, nakit-an siya sang hospital staff kag didto na ginkumpronta.
Ginpangbuyayaw pa sini pati ang mga doktor kag nurse gamit ang lenggwahe nga indi mahangpan, gani sang ulihi, gintawag ang security kag gin-updan ini pabalik sa ospital kun sa diin magatinir ini tubtub nga ma-settle ang iya nga balayran.#
(via Oddity Central)
