ILOILO – Dapat gihapon nga mangin alerto kag magpadayon sa pag-monitor ang mga kabanwahan sa probinsya sang Iloilo kaangot sa pagsulod sang bagyo nga si “Tisoy” sa Philippine Area of Responsibility (PAR).
Ini apisar nga ginalantaw nga wala man ini sang direkta nga epekto sa probinsya bangud iguon sang bagyo ang naibabaw nga bahin sang Bicol Region.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office (PDRRMO), iya ginpahayag nga may mabatyagan nga pagpang-ulan ulan sa Martes ukon Mierkules sa masunod nga semana apang indi tuman kabaskog ang hangin.
Ginpahayag sang natungdan nga iya na ginhatagan sang instruksyon ang mga Municipal Disaster Risk Reduction and Management Office (MDRRMO) nga indi mag-untat sa pagmonitor sang lakat sang panahon.
May yara man sang advisory nga ginhatag si Bionat kay Iloilo Governor Arthur Defensor Jr. nga mahimo gid nga dayunon ang paghiwat sang opening of lights kag inauguration sang provincial provincial capitol grounds sa Disyembre 2, Lunes nga adlaw.
Ini ang kasunod man sa ginpabutyag nga kahangawa sang gobernador bangud may mga mataas nga opisyal nga magakadto kag madamo man sa publiko ang ginalauman nga magadugok sa amo nga aktibidad.
Kaangot naman sa impormasyon nga saligan sang publiko, mas maayo gid suno kay Bionat nga pamatian ang update kag forecast nga nagikan sa Philippine Atmospheric, Geophysical and Astronomical Services Administration (PAGASA).
Dugang ni Bionat, indi dapat nga magsalig ang pumuluyo sa mga international updates bangud indi tul-id ang ila impormasyon ipaanggid sa PAGASA nga mas nakahibalo sang panahon sa pungsod kag mahimo man malab-ot paagi sa internet.
