ILOILO CITY- Ipaidalom sa ballistic examination ang nakit-an nga deformed slug sa guwa sang puluy-an ni Iloilo 1st District Rep. Janette Garin sa Torreblanca-Blumentritt, Guimbal, Iloilo.
Sa interview sang Bombo Radyo kay Police Captain Felice Dioso, hepe sang Guimbal Municipal Police Station, iya ginpahayag nga ang caretaker amo ang nakakita sang deformed slug samtang nagapaninlo ini sa likod sang balay.
Suno kay Dioso, indi man makabig nga stray bullet incident ang natabo.
Base sa pagpangusisa sang otoridad, ang kalayuon sang bala nagapakita nga malapit lang sa lugar ang nagpalupok sang pusil.
Posible naman nga iya sang caliber 40 ukon caliber 45 ang slug nga nakit-an.
Wala naman sang may nakit-an nga na-damage sa lugar nga mahimo igo sang amo nga bala.
