Posible nga nagalab-ot sa $2.5 bilyon ukon mga P151 bilyon ang nadula sa kita sa Pilipinas sa nagligad nga duha ka tuig bangud sang nagalapta nga ilegal nga pagbaligya sang sigarilyo kag e-vape.
Sandig ini sa nagguwa nga pagtuon halin sa EU-ASEAN Business Council kag Euromonitor International.
Halin sang 2024 tubtub sang 2025, ginabanta nga wala nakakolekta ang pungsod sang $2.06 bilyon nga buwis halin sa sigarilyo kag $400 milyon halin sa e-vapes.
Sa Southeast Asia, ang Pilipinas amo ang may ikaduha nga pinakamataas nga pierde sa kita nga sunod sa Malaysia nga may $2.51 bilyon.
Sa kabug-usan, ang pierde sang kita sang Association of Southeast Asian Nations (ASEAN) 6 ginabanta nga nagtupa sa $13.07 bilyon para sa 2024 kag 2025.
Suno kay Chris Humphrey, executive director sang EU-ABC, sa tion sang wala sang kasiguruhan sa pulitika kag tensyon, samtang naga-atubang sang mga problema sa supply chain bangud sang krisis sa Middle East nga mabatyagan gid diri sa Pilipinas, ang kuwarta nga nadula sa mga gobyerno mahimo kuntani nga magamit para mabuligan nga mapahagan-hagan ang epekto sini.
Nagpahayag ini nga mahimo kuntani ini magamit sa fuel subsidies ukon sa pondo para sa mga eskwelahan, ospital kag imprastruktura.
Nagpaandam man ini nga possible maglala ang problema sa ilegal nga negosyo kun magpadayon ang gyera sa Middle East.
Ini bangud sa tunga sang epekto sang mataas nga inflation sa mga konsumidor, mas pili-on nila ang mas barato kag ilegal nga mga produkto.
Diri sa Pilipinas, nagapatuman ang gobyerno sang singko porsyento nga pagsaka kada tuig sa excise tax sang sigarilyo.
Ginpanugyan man ni Humphrey nga dapat likawan sang gobyerno ang gulpyada kag daku nga pagsaka sang buwis sa sigarilyo bangud mahimo ini makapakibot sa merkado kag magtulod pa gid sa mga konsumidor padulong sa ilegal nga merkado.
Nahibaluan nga sandig sa Bureau of Internal Revenue (BIR), tuyo sini nga makakolekta sang P359.6 bilyon nga excise tax sini nga tuig.
