ILOILO CITY – Masobra isa ka milyon ka pesos ang balor sang halit sang sunog nga nagluntad sa Brgy. Concepcion, City Proper.
Sa interview sang Bombo Radyo kay Fire Chief Inspector Melanie Habawel, naglab-ot sa P1, 291, 680 ang balor sang naupos sang kalayo, sa diin lima ka balay ang apektado — tatlo ang totally burned, samtang duha naman ang partially burned.
Ang totally burned nga mga balay ang ginapanag-iyahan nanday Reynaldo Domingo, Patrick Laurente kag Asarinas Jaca.
Samtang, partial naman ang nasunog sa balay nanday Odel Odela kag Eduardo dela Cruz .
Suno kay Habawel, santo sa initial nga imbestigasyon sang Bureau of Fire, short electrical circuit ang ginhalinan sang sunog.
Samtang, naglab-ot naman sa P1, 126, 190 ang balor sang halit sang sunog nga nagluntad sa Barangay Gloria Iloilo City Proper.
Santo sa record sang Bureau of Fire, anom ka balay ang apektado.
Totally burned ang balay nanday Filomena Provido, Anna Marie Posing, Josephine Sta. Maria, Kagawad Jocelyn Villadies, Kagawad Reynaldo Rosales, kag Jenalyn Pasinag.
Suno kay Habawel, nagapadayon pa ang imbestigasyon kaangot sa ginhalinan sang sunog.
