Gin-claim na sang pamilya ang bangkay sang abogada nga isa sa mga napatay sang nagluntad ang engkwentro sa tunga sang New People’s Army (NPA) kag tropa sang gobyerno sa Bilar, Bohol.
Diri man kag ginkumpirma sang pamilya nga si “Hannah Jay Cesista” nga napatay amo man si “Hannah Jay Cesista” nga nakapasar sa 2023 Bar Examinations.
Mismo ang amay sini nga si Eutropio Alegre Cesista ang nag-claim sa iya bangkay sa Tagbilaran City, Bohol.
Ang mga Cesistas ang tumandok sang Catubig, Northern Samar suno sa Visayas Command.
Kasunod sang amo nga hitabo, ginpahayag sang militar nga ang Communist Party of the Philippines-New People’s Army (CPP-NPA) amo ang halit nga nagapangbiktima sang lamharon nga pinsar sang mga tawo.
Nagpahayag man sang simpatiya ang militar sa pamilya sang abogada nga kuntani suno sa ila, isa na ka maayo nga practicing lawyer kun wala lamang ginganyat sang rebelde nga grupo.
Si Hannah Jay, alias Maya kag Lean, ang nag-eskwela para sa iya nga preparatory course for law sa University of the Philippines-Cebu. Ginpahayag pa sang Visayas Command nga aktibo ini nga myembro sang Anakbayan-Cebu kag sang ulihi National Union of Peoples Lawyers (NUPL).
Nangin full-time member ini sang CPP-NPA sang 2023 suno pa sa militar.
Matandaan nga natabo ang engkwentro sang Byernes sang aga, Pebrero 23, sa Barangay Campagao sang maserbe kuntani sang arrest warrants ang mga operatiba sang Police Regional Office-Central Visayas kag mga soldado sang Viscom batok sa mga katapo sang rebelde.
Bangud sa nagluntad nga linukpanay nga naglawig sang masobra tatlo ka oras, magluwas sa abogada, may apat pa ka napatay halin sa ginpahayag nga NPA, samtang isa naman ang napatay sa bahin sang pulisya.
