Ginpaidalom na sa state of calamity ang banwa sang New Lucena, Iloilo bangud sa nagalala nga epekto sang krisis sa gatong.
Base sa deklarasyon, nagbilin sang dako nga problema ang padayon nga pagtaas sang presyo sa gatong sa nasambit nga banwa.
Apektado ang mga drivers kag mga pasahero bangud sa pagtaas sang pamasahe kag limitado man ang pagbyahe .
Nagapangatubang man sa karon sa pagpanghangkat ang mga lokal nga negosyo bangud sa pagtaas sang operational costs.
Bunga sini nagtaas man ang presyo sang mga balaklon.
Base sa rekomendasyon sang Municipal Disaster Risk Reduction and Management Council (MDRRMC), gin-aprubahan sang Sangguniang Bayan ang deklarasyon agud mahatagan sang nagakaigo nga solusyon ang sitwasyon.
Sa idalom sang deklarasyon, mahimo magamit ang MDRRM Fund para mangin madali ang paghatag sang ayuda kag makapatigayon sang tikang ang LGU agud mapahagan-hagan ang epekto sang krisis sa mga apektado nga sektor.
Nahibaluan nga magluwas sa New Lucena, una na nga ginpaidalom sa state of calamity ang banwa sang Ajuy.
Samtang, ginpahayag ni Iloilo Governor Arthur Defensor Jr. nga kon ipaidalom man sa state of calamity ang bug-os nga probinsya, may nakahanda na nga pondo nga nagalab-ot sa 82 million pesos para buligan ang mga apektado nga sektor.
