Gin-akusaran sang Pilipinas ang China Coast Guard (CCG) nga nagbalabag, nagsunod-sunod, kag nag-intercept sa automatic identification system (AIS) signal sang barko sang Bureau of Fisheries and Aquatic Resources (BFAR) sa Bajo de Masinloc ukon Panatag ukon Scarborough Shoal sa Zambales.
Natabo ini sang nagligad nga Huwebes, Pebrero 22, kun sa diin ginpatigayon ang rotational deployment sang Philippine Coast Guard (PCG) kag BFAR sa Bajo de Masinloc.
Suno kay PCG spokesperson for West Philippine Sea Commodore Jay Tarriela, naghalin ang BRP Datu Sanday sa Capinpin Port sa Orion, Bataan sang Pebrero 21 agud managtag sang fuel kag grocery packs sa mga manugpangisda nga Pinoy kag magpatroya na lamang sa West Philippine Sea.
Pasado las 6:00 sang aga sang Pebrero 22, nagsugod na sa pagsunod-sunod ang barko sang China sa BRP Datu Sanday.
May yara man sang wala natumod nga warship nga kaupod sang amo nga barko.
Samtang nagapalapit na ang BRP Datu Sanday sa Bajo de Masinloc, nagpaguwa na ang China sang deployed rigid-hull inflatable boats (RHIBs) “3065” kag “3302-1” agud nga magplastar sang floating barrier — isa ka paagi nga ila masami nga ginahimo agud balabagan ang barko sang iban nga pungsod nga makasulod sa shoal.
Pasado 8:00 sa aga sang gin-block sang China ang signal sang AIS sang BRP Datu Sanday agud nga suportahan ang press release sang China nga madinalag-on nila nga napunggan ang barko sang Pilipinas nga makasulod sa shoal.
Makaligad sadto, nagpaguwa matuod ang CCG sang statement sa ila nga official website nga napunggan nila ang Philippine vessel nga ila gin-alegar nagasulod sa dagat nga kaiping sang Huangyan Dao ukon ang Bajo de Masinloc.
Ang AIS isa ka importante nga factor sa safe sea maneuvering bangud amo ini ang naga-transmit sang position sang vessel agud nga mahibaluan sang iban nga barko ang lokasyon sini.
Kun bulagon ang isa ka barko paagi sa pag-block sang automatic identification system signal, daku ang risgo nga matabo ang grounding ukon ang pagbungguanay.
Nagapati si Tarriela nga ginapatigayon sang China ang jamming samtang nga gina-release nila ang statement nga ginapunggan nila ang barko sang Pilipinas.
Paagi sa sini, anuman nga commercial AIS nga naga-monitor ang indi man gihapon makasiling nga sala ang statement sang China bangud nga indi man nila mahibaluan kun sa diin ang lokasyon sang barko sang Pilipinas.
Suno pa sa report sang PCG, apisar sang pagbalabag kag pagsunod-sunod sang iban nga barko sa BRP Datu Sanday, nakaabot ini sa mga Filipino fishermen nga nagahulat sang fuel assistance.
44 ka Filipino fishing boats ang nagatinir sa amo nga area kag bangud sa ila bag-o nga fuel kag groceries, makapadugay-dugay pa ang mga kadagatan kag makahulik sang mas madamo nga isda.#
