Nag-abot na sa Pilipinas ang mga barko kag personnel sang Estados Unidos sang Amerika kag Japan para sa trilateral maritime exercise nga amo ang labing-una nga joint coast guard drills sang tatlo ka pungsod.
Apat ka barko sang Philippine Coast Guard ang nagapasakop lakip ang BRP Melchora Aquino, BRP Gabriela Silang, BRP Boracay, kag isa ka 44-meter multi-role response vessel.
May yara man sang US Coast Guard cutter kag Japanese Coast Guard cruiser.
Suno kay Philippine coast guard spokesman Armand Balilo, inisyatibo sang Amerika kag Japan ang exercises samtang maga-upod naman ang Australia bilang observer.
Ang United States kag Japan amo ang nagapanguna sa pag-suplay sang sakayang pandagat nga ginagamit sang Philippine coast guard kag Philippine navy sa pag-patrol sa dagat sang Pilipinas.
Nahibaluan nga sunod-sunod ang ginahimo sang Amerika nga pagpabaskog sang alyansa sa seguridad sa Asia-Pacific region bilang kabahin sang tikang sa pagsagang sang mga agresibo nga mga tikang sang China sa Taiwan kag sa West Philippine Sea.
Sa pihak nga bahin, nagahulag man ang China kag nagahimo man sang drills sa dagat. Nakahimo na ini sang military exercises kaupod sa Laos, Singapore kag Cambodia subong nga tuig kag natalana nga magpadala sang warships kadungan sang multilateral naval exercise sa Indonesia subong nga bulan. #
