Magaabot sa Pilipinas subong nga adlaw, Agusto 5, ang barko sang Vietnamese Coast Guard para sa apat ka adlaw nga pagbisita lakip na ang joint search and rescue drills amo man ang fire and explosion prevention training.
Masobra 80 ang crew sa amo nga barko nga ginapangunahan ni Vietnam Coast Guard Region 2 Deputy Commander Senior Lieutenant Colonel Hoang Quoc Dat.
Magluwas sa drills kag training, magakadto man ang Vietnamese Coast Guardsmen sa Philippine Coast Guard – National Coast Watch Center, Marine Science Investigation Force, kag offshore patrol vessel nga BRP Gabriela Silang.
Suno sa Vietnamese Defense Ministry, ang pagbisita sang ila barko ang nagapakita sang “profound political significance” bangud oportunidad ini sa pareho nga coast guard forces nga itib-ong ang comprehensive cooperation kag pasangkaron pa ang law enforcement ability sa dagat.
Nahibaluan nga sang Enero 2024, nagpirma ang Philippine and Vietnamese Coast Guards sang memorandum of understanding kun sa diin gin-establisar ang joint Coast Guard committee kag hotline communication mechanism.
