ILOILO CITY – Nagpromisa si poverty alleviation adviser Larry Gadon nga tutukan ang mga proyekto may kaangtanan sa nutrisyon sang pamatan-on kag unahon sang gobyerno ang pagtanyag sang trabaho kag indi ang paghatag sang ayuda sa pagbulig sa mga pigado nga Pilipino.
Suno kay Gadon, ang “BBM: Batang Busog, Malusog” nga isa ka feeding program, ang isa sa mga una niya nga proyekto agud nga masolbar ang kapigaduhon bilang pagkilala sang importansya sang nutrisyon kag ang koneksyon sini sa edukasyon.
Ang proyekto ang posible nga ilunsyar sa Hulyo ukon sa tion sang nutrition month.
Ang Department of Social Welfare and Development ang magapatuman man sang pilot run sang food stamp program sa nasambit nga bulan.
Suno pa sa kontrobersyal nga suspended lawyer, enganyuhon niya ang dalagko nga kompaniya kag negosyante nga mag-adopt sang public shool sa ila lugar agud nga magpatuman sang nasambit nga programa bilang kabahin sang ila nga corporate social responsibility.
Samtang, ginpahayag man sang anti-poverty czar nga ang job oppurtunity ang lyabe agud nga mabatak ang mga Pilipino nagikan sa kapigaduhon.
Sang Lunes, gin-appoint ni President Ferdinand Marcos, Jr si Gadon sa amo nga posisyon.
