ILOILO CITY – Ginhatag sa iban nga pungsod ang masobra sa isa ka milyon nga doses sang bivalent vaccines nga dapat nga i-donate sa Pilipinas.
Kung matandaan, dapat nga makabaton ang pungsod sang masobra sa isa ka milyon ka doses sang bakuna apang wala nadayon bangud nga natapos na ang Coronavirus Disease 2019 state of calamity kag indi na makahimo sang emergency procurement ang Department of Health.
Suno kay Department of Health officer-in-charge Maria Rosario Vergeire, wala pa sang final agreements ang donasyon nagikan sa COVAX bangud nga ang una nga batch nga dapat nga i-deliver sa pungsod ang naatrasar gani, ginhatag na lang anay sa iban nga pungsod.
Apisar sini, nagpasalig naman ang COVAX nga mahimo nga mahatagan sang bakuna ang pungsod sa tion nga ma-legalize ang agreement.
Una na nga ginpaathag ni Vergiere nga ang gobyerno ang wala na sang legal nga basehan sa pagsulod sa kasugtanan sa vaccine manufacturer nga COVAX pagkatapos sang state of calamity nga nag-nullify sang Republic Act 11525 ukon ang COVID-19 Vaccination Program Act of 2021.
Ginalauman nga sa katapusan sang bulan sang Mayo, mabaton na sang pungsod ang 390,000 doses.
Ang bivalent vaccines ang naga-target sang specific nga variants sang COVID-19 kaangay sang makalalaton nga Omicron.
