Padayon ang konstruksyon sang bag-o nga opisina sang Bureau of Jail Management and Penology Region 6 nga nahamtang sa atubang sang ginapatindog man nga Iloilo City District Jail Building sa Barangay Buntatala, Leganes, Iloilo, kag ginpahayag nga wala ini naapektuhan sang isyu sa contractor nga konektado sa maanomalya nga proyekto.
Sa interview sang Bombo Radyo kay Atty. Juniven Rey S. Umadhay, tagpamaba sang Bureau of Jail Management and Penology 6, suno sa iya nga ang konstruksyon sang regional office padayon kag wala sang problema sa subong, kag ginpasiguro niya nga ang contractor nga J.E. Tico Construction Co., Inc. wala naupod sa listahan nga ginpabuyagyag ni President Ferdinand Marcos Jr.
Ginpahayag man ni Umadhay nga yara na sa 48% ang progreso sang proyekto sang opisina.
Matandaan nga na-revoke ang lisensiya sang Amethyst Horizon Builders and General Contractor, Inc., nga konektado sa pamilya Discaya, bangud sang maanomalya nga flood control projects.
Samtang padayon man ang konstruksyon sang Iloilo City District Jail Building sa Barangay Buntatala, Leganes, apang wala pa ini natapos bisan pa nga ginplano nga matapos sa Oktubre 2025.
