ILOILO CITY- Ginhatagan sang Sangguniang Panlalawigan sang ultimatum nga tubtob subong nga semana ang Department of Public Works and Highways Region 6 nga maghatag sang progress report tuhoy sa rehabilitasyon sang bag-o nga Ungka Flyover.
Sa interview sang Bombo Radyo kay Board Member Rolando Distura,chairman sang Committee on Infrastructure sa Sangguniang Panlalawigan, iya ginpahayag nga wala sa gihapon ini sang nabaton nga official communication halin sa amo nga ahensya apisar nga nagpromisa ini sa nagligad nga committee hearing nga magapasa sila sang progress report.
Suno kay Distura,dismayado ini bangud nga accountable ang ahensya sa amo nga butang apang kaangay nga sila pa ang ginapaayunan kag kun wala ini nagpakig-angot sa amo nga talatapan, wala pa siya makahibalo nga wala sang masumiter nga report ang ahensya.
Sa subong, pila sa nahimo nga rekomendasyon sang Sangguniang Panlalawigan bangud sa pagpabungol-bungol kag pagpabugtoy sang Department of Public Works and Highways Region 6 amo ang masunod:
- Mag-request sa Bureau of Design sang Department of Public Works and Highways Central Office nga maghimo sang ideal design kag personal nga bisitahon kag i-assess ang tatlo ka mga flyovers nga ginatukod sa Iloilo
2.Hingyuon ang Department of Public Works and Highways Region 6 kag International Builders Corporation nga mag-hire sang consultant halin sa Semirara Mining and Power Corporation agud maghatag sang insights kag recommendation sa vertical displacement sa Ungka flyover
3.Manduan ang Department of Public Works and Highways Region 6 nga magpasa sa Committee on Infrastructure sang regular progress report sa proyekto
4.Maghingyo sa Public Safety and Transportation Management Office kag Pavia Traffic Management Office nga regularl nga magpatigayon sang meeting agud ma-address ang rerouting kag ma-manage ang traffic sa area
