Ginbuyagyag sang pinuno sang Bureau of Corrections (BuCor) nga may masobra 7,000 ka beer cans kag iban pa nga kontrabando nga napasulod sa Maximum Security Compound sang New Bilibid Prison bangud sa gina-alegar kurapsyon nga ginahimo sang mga personnel sang BuCor kag sang Bureau of Jail Management and Penology (BJMP).
Mismo si BuCor officer-in-charge General Gregorio Catapang Jr. ang nag-expose sini nga mga hilimuon nga nagaapekto sa Bilibid.
Suno pa kay Catapang, mismo ang inmates ang nag-identify sang pila ka personnel sang BuCor kag sang BJMP nga amo ang nagapalusot sang mga kontrabando.
Wala ginhingadlan ni Catapang kun sanday sin-o ang mga personnel apang i-anunsyo ini suno sa iya kun may pahanugot na halin kay Justice Secretary Jesus Crispin Remulla.
Ginpahayag ni Catapang nga hatagan man sang due process ang mga personnel nga may kahilabtanan sa kurapsyon; apang kun nabalik na sila sa ila nga respective unit, iga-turn over sila sa ila nga bureau ukon sa BJMP.
Ginpasalig naman nga i-relieve ang mga personnel sa sulod sang New Bilibid Prison.
Kahapon sang gin-anunsyo nga nakakumpiskar ang BuCor sang 7,000 cans of beer kag shabu sa sulod sang Bilibid paagi sa “Oplan Galugad” raids. ##
