Nagapabilin ang Alert Level 1 status sa Bulkan Taal matapos sang phreatomagmatic eruption kahapon sang hapon, Oktubre 2.
Ginlaragway ini sang Philippine Institute of Volcanology and Seismology (Phivolcs) nga amo ang paglupok bangud sa contact sang tubig sa idalom sang bulkan sa mainit nga magma.
Na-record ini halin 4:21 tubtub 4:32 sang hapon.
“The phreatomagmatic event was likely driven by sudden contact of water with a small branch of shallow magma that has been in place beneath the Taal Main Crater and that has been degassing sustained levels of SO2 for the past three years,” suno sa ahensya.
Sa idalom sang Alert Level 1 nga amo ang status sang bulkan halin pa sang Hulyo 11, 2022, posible matabo ang phreatic explosions, volcanic earthquakes, minor ashfall, kag lethal accumulations ukon expulsions sang volcanic gas nga delikado malapit sa isla.
Istrikto sa gihapon nga ginadumilian ang pagsulod sa Taal Volcano Island kag sa permanent danger zone.
Ginadumilian man ang pagpalupad sang aircraft malapit a baba sang bulkan.
Gina-abisuhan naman ang mga residente nga magpabilin sa sulod sang balay, siraduhon ang mga puertahan kag ang bintana para indi makasulod ang abo ukon vog, kag kun kinahanglan gid magguwa, kinahanglan nga magsuksok sang mask kag goggles bilang proteksyon sa mata.
Katapusan nga naglupok ini nga bulkan sang Hulyo 2021 kag ginpaidalom anay sa Alert Level 3.
