90% nga handa na ang Cabacanan Elementary School, isa ka eskwelahan sa Alimodian, Iloilo nga nalakip sa ginrekomendar sang Schools Division of Iloilo nga makapatigayon na sang limited face-to-face classes.
Sa interview sang Bombo Radyo kay Mr. Rene Alingasa, Principal 1 sang Cabacanan Elementary School, iya ginpahayag nga sang December 2020 pa sila nakaumpisa sa paghanda kag ginbuligan man ini sang local government unit (LGU).
Suno kay Alingasa, naghatag ang LGU sang budget para sa pagtukod sang toilet kag handwashing facility. Ginkay-o naman ang mga classrooms, gintinluan, kag na-identify kun sa diin nga hulot ang gamiton sa pagbalik sang elementary students.
Ginpahayag sang natungdan nga 80% nga fully-vaccinated naman ang mga manunudlo. Sandig naman sa resulta sang meeting kaupod ang mga ginikanan kun sa diin ginplastar ang pros and cons sang pagbalik sang face-to-face classes, positibo kag excited ang reaksyon suno kay Alingasa bangud masobra naman isa ka tuig umpisa sang gin-implementar ang distance learning.
Ginahulat pa subong sang eskwelahan ang order sang Department of Education (DepEd) para sa specific guidelines sa pagpatuman sang in-person classes.
