Opisyal na nga nag-umpisa subong nga adlaw, Marso 25, ang campaign period para sa local candidates.
Sandig sa guidelines sang Commission on Elections (COMELEC), ginadumilian ang mga kandidato nga maghakos, mag-beso-beso, ukon mag-close contact sa mga tawo nga ila nga ginapadulungan samtang nagapangampanya.
Ginadumilian man ang pag-selfie kaupod mga kandidato.
Kun magkadto sa mga face-to-face nga mga aktibidad, dapat gihapon isuksok ang face mask kag sundon ang social distancing.
Sa interview sang Bombo Radyo kay COMELEC spokesperson James Jimenez, iya ginpahayag nga kadungan sang pag-umpisa sang campaign period para sa mga local candidates, ipatuman man ang Operation Baklas.
Pangkakason ang tanan nga campaign posters sa pampubliko nga lugar nga wala nagasunod sa size requirement kag wala nabutang sa nadesignar nga mga espasyo.
Limitado lang ang Operasyon Baklas sa mga posters kag tarpaulin nga yara sa pampubliko nga lugar bangud kun matandaan, nag-isyu ang Korte Suprema sang Temporary Restraining Order (TRO) batok sa pagpangbaklas sa campaign materials nga yara sa pribado nga mga propiedad.
