Balik na sa kondisyon ang lawas sang Pinoy Olympian nga si Carlo Paalam sa una nga pagsabak sa World Qualification Tournament sa Bangkok, Thailand nga amo man ang iya ulihi nga tyansa nga maka-sulod sa Paris Olympics subong nga tuig.
Ginlutos sini ang iya una nga kasumpong nga si Alexei Lagkazasvili sang Greece sa round of 64 sang men’s 57kg.
Nahimo ini ni Paalam paagi sa unanimous decision sang mga judges nga lunsay nag-skor sang 30-27 pabor sa iya.
Ang finalists lamang sa men’s 57kg amo ang awtomatiko nga hatagan sang ticket para sa Olympiada samtang ang duha nga malutos sa semifinals ang magasambuwa para sa katapusan nga Paris spot nga available pa sa amo nga division.
Matandaan nga sang Marso sa Italya, ginpadala man sang Pilipinas si Paalam sa World Qualification Tournament apang nag-surrender ini sa tunga-tunga sang hampang sa last 16 bangud sa injury sa iya abaga. Sang amo nga tion, kasumpong sini si Shukur Ovezov sang Turkmenistan nga amo ang awtomatiko nga nagsulod sa masunod nga round bangud sa pag-withdraw sang Pinoy Olympic silver medalist.
Kag daw kaangay nga isa ka hampang sang kapalaran, liwat nga magakit-anay sanday Paalam kag ang nasambit nga boksidor sa round of 32 sa Martes, Mayo 28.
Magluwas kay Paalam, ang ginpadala sang Pilipinas sa Bangkok amo sanday Rogen Ladon (men’s 51kg), Criztian Pitt Laurente (men’s 63.5kg), kag Hergie Bacyadan (women’s 75kg).
Tuyo nila nga updan ang tatlo ka Pinoy boxers nga una na nag-qualify sa Olympics nga amo sanday Eumir Marcial, Nesthy Petecio, kag Aira Villegas.
