Ginmanduan sang Office of the Ombudsman sanday Senator Alan Peter Cayetano kag Senator Robin Padilla nga magsabat sa reklamo batok sa ila kaangot sa pagpalagyo ni Senator Ronald “Bato” Dela Rosa halin sa Senate premises sang nagligad nga bulan.
Magluwas sa duha ka senador, ginapasabat man ang suspendido nga Senate sergeant-at-arms nga si Mao Aplasca.
Ginmandu ni Assistant Ombudsman Moreno Generoso nga dapat ipasa sang tatlo ang ila counter-affidavit sa complaint nga ginpasaka sang Tindig Pilipinas.
Kun indi makapasa sanday Cayetano, Padilla, kag Aplasca sang counter-affidavit sa sulod sang 15 ka adlaw matapos nga nabaton nila ang mandu halin sa Ombudsman, indi na magbaton ang talatapan sang ano man nga dokumento ukon ano man nga apelar halin sa ila kampo.
Nahibaluan nga sa reklamo sang Tindig Pilipinas, ginaakusaran sanday Cayetano, Padilla, kag Aplasca sang obstruction of justice bangud ang ila aktwasyon ginapahayag nga nagapakita nga ginpunggan nila ang pagpatuman sang legal process kag performance sang legal functions.
Matandaan nga may arrest warrant na kay Bato dela Rosa halin sa International Criminal Court (ICC) apang ginpaidalom siya sang Senado sa “protective custody.” Sang amo nga tion, si Cayetano ang nagapungko nga Senate President.
Sang Mayo 13 sang gab-i, may natabo nga “shooting” sa Senado nga sang ulihi naggwa man sa imbestigasyon sang pulis nga wala sang pagpang-atake.
Sang Mayo 14, pasado alas dos sang kaagahon, nakapalagyo na si Dela Rosa sakay sa salakyan ni Padilla, apang nagapanindugan naman si Padilla nga ginpasakay lang niya si Bato bangud nag-ayo ini, ginbilin niya ini sa Makati, kag wala na ini nagpahibalo kun sa diin siya makadto.#
