Gin-withdraw sang People’s Liberation Army Navy sang China ang ila ginpadala nga surveillance vessel kag gin-islan sang warship agud nga mag-ikog sa mga barko sang Pilipinas, Amerika, kag France nga nagapatigayon sang naval drills sa West Philippine Sea.
Suno kay Commander Marco Sandalo, commanding officer sang BRP Davao del Sur, nakit-an nila 6:00 sang aga ang PLA Navy vessel 570 ukon mas kilala nga Chinese frigate Huangshan nga naga-monitor sa naval convoy sang Balikatan exercises sa kalayuon nga 50 nautical miles west sang Palawan.
Indi pa maathag subong kun ano ang rason sang China kun ngaa gin-islan nila sang warship ang ila surveillance vessel sa sulod sang pila ka oras. Ang amo nga warship ang armado sang anti-submarine capabilities.
Ginpahayag nga siyam ka oras ang pag-monitor sang warship kag sang ulihi, ginbalik man sang China ang ila nga surveillance vessel 793.
May nakit-an man nga fishing vessels nga nagalayag 12 nautical miles halin sa exercise area sang Balikatan apang indi pa makumpirma suno sa commander kun ang mga ini ang kabahin sang maritime militia sang China.
Matandaan nga una na nagpaguwa sang statement ang China nga nagapamatok sa military drills sa West Philippine Sea, apang sa pihak sini, nagpadayon ang BRP Davao del Sur, BRP Ramon Alcaraz kag USS Harper’s Ferry sa naval drills lakip na sa maritime search and rescue exercise.#
