ILOILO CITY – Ginpanginwala sang embahada sang China sa Pilipinas ang ginpahayag ni Senate President Juan Miguel Zubiri nga nalakip na ang Pilipinas sa tourism blacklist sang Beijing.
Una na nga ginpahayag ni Zubiri nga sa ginpatigayon nga pagsinapol, ginpahibalo ni Chinese Ambassador to the Philippines Huang Xilian ang mga senador sa amo nga blacklist bangud sa padayon nga operasyon sang Philippine offshore gaming operators.
Apang, suno kay Sen. Sherwin Gatchalian nga yara man sa amo nga pagsinapol, wala nakabuya sang amo nga pahayag ang ambassador.
Pahayag ni Gatchalian, indi kumpirmado nga yara na sa blacklist ang pungsod apang dako ang posibilidad nga matabo ini.
Ginakahangaw-an sang ambassador nga magapadulong sa Pilipinas ang mga Chinese nga turista agud nga magtrabaho sa Philippine offshore gaming operators.
Bangud sini, dumili-an nila ini apang wala sang blacklisting nga matabo.
Bilang sabat sa pahayag sang Chinese embassy, nagdepensa si Zubiri nga ang tono sang pahayag ni Huang amo nga ang Pilipinas ang ginabantayan na nga tourist hotspot kag ginpa-andaman ang mga Chinese sang posible krimen nga matabo nga makaulamiran nila bangud sang Philippine offshore gaming operators.
Suno sa iya, lain lang ang iya pagkaintindi sa ginpahayag ni Huang.
Mismo ang ambassador ang naggamit sang mga tinaga nga tourism blacklist kag indi halin sa ila nga mga senador.
Posible suno sa senador nga ang buot silingon sang ambassador amo ang “future tense” kag indi ang “present tense.”
Nahibaluan nga ginkumpirma ni Huang nga nagsapol siya sa mga senador sang Lunes apang wala na gindetalye ang mga topiko nga naistoryahan.
Sa pinakaulihi naman nga pahayag sang embassy, ang mga krimen nga naangut sa Philippine offshore gaming operators ang indi lamang delikado sa interes sang China kag sa relasyon sang China kag Pilipinas kundi mangin sa interes sang Pilipinas.
Ang target sang Philippine offshore gaming operators amo ang mga customer nagikan sa China bangud nga pagsugal sa amo nga pungsod.
Base sa data halin sa Department of Tourism, ang Chinese tourist arrivals sang 2019 ang naglab-ot sa 1.74 million.
Apang, subong nga tuig, yara lang ini sa 22, 236.
