Gin-report sang militar nga may Chinese warships nga na-monitor kadungan sang joint drills sang Estados Unidos, Japan, Australia, kag Pilipinas sa sulod sang exclusive economic zone (EEZ) sang pungsod.
Suno kay Armed Forces of the Philippines (AFP) public affairs office chief Colonel Xerxes Trinidad, nakit-an ang vessels sang People’s Liberation Army Navy apang wala man sila naghilabot sa Multilateral Maritime Cooperative Activity (MMCA) sang apat ka mga pungsod.
Bangud sini, nangin matalunsay ang ginpatigayon nga drills kag ginpasalamatan man sang talatapan ang positibo nga resulta kag kooperasyon nga ginpakita sang tanan nga nagpasakop.
Sang Miyerkules sang nag-updanay ang militar sang apat ka nasamit nga pungsod para sa ika-anum nga joint drills sa West Philippine Sea agud nga pabaskugon pa ang regional and international cooperation bilang suporta sa hilway kag malinong nga Indo-Pacific.
Sa amo nga drill, ginpadala sang Pilipinas ang BRP Jose Rizal kag Philippine Air Force Search and Rescue (SAR) assets.
Naggamit naman ang Australia sang HMAS Hobart (DDG39) kag P-8A Poseidon aircraft; may JS Akizuki (DD115) ang Japan; samtang yara naman ang USS Benfold (DDG65) kag P-8A Poseidon sang US.
Lakip sa exercises nga ginhimo amo ang Communication Check Exercises (COMMEX), Maritime Domain Awareness and Contact Reporting, Division Tactics and Officer of the Watch Maneuver (DIVTACS/OOW), Photo Exercise (PHOTOEX), kag Anti-Submarine Warfare (ASW) Exercises.
