ILOILO CITY- May bag-o na nga chairperson Commission of Human Rights (CHR) kasunod sang kamatayon sang former head sini nga si Jose Luis Martin “Chito” Gascon.
Ini amo si Commissioner Leah Tanodra-Armamento nga magapamuno sa organisasyon kag tapuson ang wala pa natapos nga termino ni Gascon tubtob sa Mayo subong nga tuig.
Si Tanodra-Armamento ang kabahin sang Fifth Commission en banc sang CHR nga nagalakip man kanday Commissioners Karen Gomez-Dumpit, Gwendolyn Pimentel-Gana, kag Roberto Eugenio Cadiz.
Antes nagsulod sa CHR, si Tanodra-Armamento nangin Associate Solicitor sa Office of the Solicitor-General sa diin nag-assist siya sa solicitors sa habeas corpus cases.
Sunod siya nagsaylo sa Department of Justice (DOJ) sang 1991 kag nagsaka gikan sa State Prosecutor pakadto sa Senior State Prosecutor.
Sang 2003, si Tanodra-Armamento ang gin- appoint bilang DOJ Assistant Chief State Prosecutor kag nangin DOJ Undersecretary.
Nagkuha siya sang law degree sa Ateneo De Manila University School of Law.
Nangin fellow ini sang Harvard University’s John F. Kennedy School of Government sang 2007.
