Wala nakapadayon sa misyon ang civilian boats sang mga Pilipino nga pakadto kuntani sa Patag kag Lawak Islands sa West Philippine Sea matapos ginsundan kag ginpalibutan sang mga barko sang China.
16 ka oras na nga nakalayag ang barko nga M/V Kapitan Felix Oca halin sa El Nido, Palawan apang nag-desisyon na lamang ang kapitan nga magbalik bangud ginapalibutan sila sang tatlo ka barko sang China kun sa diin nalakip ang duha ka warships kag isa ka Coast Guard vessel.
Misyon kuntani sang civilian ship nga maka-abot sa Lawak Islands (sakop pa sang teritoryo sang Pilipinas) agud makapanghatag sang Christmas gifts sa mga manugpangisda nga Pinoy kag mga soldado nga nagapatrolya sa area.
Bangud sa natabo, nagsiling ang Atin Ito Coalition nga ipadala na lang ang ila nga Pamaskwa sa iban nga paagi.
Nagbalik man ang mga manugpangisda nga nagsunod sa misyon nga nasakakay sa ila nga tagsa ka sakayan.
Suno naman sa Akbayan, nag-umpisa ang Chinese vessels sa pagsunod sa barko sang Pilipinas 3:40 p.m. kahapon, Disyembre 10, sa south sang Kayumanggi Bank.
Nahibaluan nga nag-escort man ang Philippine Coast Guard sa amo nga Christmas convoy sang naglabay ini sa hotly contested Spratly Islands sa West Philippine Sea nga gina-claim sang China.
Duha ang tinutuyo sang Christmas Convoy: una, hatagan sang pasidungog ang mga Filipinos nga amo ang yara gihapon sa amo nga teritoryo apisar sang mga pagpang-harass sang China sa West Philippine Sea; kag ikaduha, pamatud-an nga makaagi gihapon sang safe ang mga ordinaryo nga Filipinos sa ila kaugalingon nga teritoryo.
