Umpisahan na sang Commission on Elections (Comelec) ang “full swing” nga printing sang halos 92 million official ballots nga gamiton sa December 5 Barangay and Sangguniang Kabataan Elections (BSKE).
Sa abiso nga ginpaguwa sang poll body, gin-imbitar ni acting Comelec spokesperson John Rex Laudiangco ang stakeholders nga updan ang activity subong nga adlaw sa National Printing Office sa Quezon City.
Pagkatapos sang soft-launch printing sang Sept. 29, iga-print man suno sa poll body ang iban pa nga accountable forms.
Ginalantaw sang poll body nga maka-print sang 3 million ballots kada adlaw ukon gamiton ang tatlo ka machines nga maka-print sang tag-isa ka milyon kada adlaw.
Gina-target nga matapos ang bilog nga printing process sa sulod sang 30 ka adlaw.
Nahibaluan nga naaprubahan na sang Senado kag Kamara ang hagna nga i-reset ang eleksyon sa 2023 apang ginahulat pa ang pirma ni Presidente Bongbong Marcos. Padayon ang preparasyon sang Comelec samtang wala pa sang nahimo nga layi. ##
