SARA, ILOILO – Magapatigayon sang kaugalingon nga imbestigasyon ang commanding officer sang 2nd Iloilo Provincial Mobile Force Company kasunod sang report tuhoy sa ginapahayag pagpahubog sang 10 ka pulis sa sulod sang Camp Jalandoni sa Brgy. Zerrudo, Sara, Iloilo.
Sa interview sang Bombo Radyo kay Police Lt. Col. Mario Baquiran, commanding officer sang 2nd Iloilo Provincial Mobile Force Company, iya ginpahayag nga iya na nga ginahibalo kun bala matuod gid ang nga nagpahubog sa sulod sang kampo ang 10 ka mga pulis.
Suno kay Baquiran, wala pa siya sang listahan kun sanday sin-o ang naulamid sa nasambit nga kontrobersiya apang ang 10 ka pulis ang ginpatawag na sa Police Regional Office 6.
Ginpahayag ni Baquiran nga ang kalabanan sa mga pulis nga yara sa sulod sang Camp Jalandoni amo ang bag-o lang nakatapos sa Basic Internal Security Operation Course kag bangud sa ginapatuman nga quarantine, yara lang sila sa sulod sang kampo nagapatigayon sang sports activities.
Ang iban naman nga organic member sang 2nd Iloilo Provincial Mobile Force Company ang may yara sang border deployment rason na indi gid matutukan sang maayo kun bala may yara sang ginapalusot sa sulod sang kampo.
Mahimo nga nagsalig ang mga nagabantay nga sundon sang mga pulis ang nagakaigo nga protocol ilabi na subong nga may yara sang liquor ban kag may ginapatuman nga quarantine.
