ILOILO CITY – Apisar nga aprubado na sa third kag final reading sa Senado ang hagna nga nagaduso nga ipaiway ang synchronized baranggay kag Sangguniang Kabataan elections, magapadayon sa gihapon ang pag-imprinta sang mga balota.
Suno kay Commission on Elections chairman George Garcia, sa pagkamatuod, sa Huwebes, suguran na ang pag-print sang mga gamiton nga balota.
Dugang pa niya, wala pa sang layi nga nagapa-iway sang election gani, indi nila gusto mabutang sa alang-alang ang ila pagpanghanda.
Liwat nga ginpahayag sang poll body nga indi mauyang ang mga gin-print nga balota sa tion nga may yara na sang pinal nga desisyon ang pagpa-iway sang eleksyon.
Nahibaluan nga kahapon, Septymebre 28, pasado sa third and final reading sa Senado ang 2022 Barangay kag Sangguniang Kabataan Elections subong nga tuig.
17 ka mga senador ang nagboto pabor sa Senate Bill 1306 samtang sanday opposition members Aquilino “Koko” Pimentel III kag Risa Hontiveros ang wala nagpabor.
Humalin sang 2016, makapila na ka beses nga ginpaiway ang eleksyon.
