Nagpasaka na sang complaint for preliminary investigation ang Office of the Ombudsman batok kay anay House Speaker Martin Romualdez kag resigned Ako Bicol Representative Elizaldy “Zaldy” Co may kaangtanan sa ginapahayag nga anomalya sa mga flood control projects.
Lakip sa mga panumbungon amo ang plunder, direct kag indirect bribery, paglapas sa Anti-Graft and Corrupt Practices Act, kag money laundering.
Ini ang kaangtanan sa ginapatihan nga mga iregularidad sa implementasyon sang flood control projects nga nangin sentro sang kontrobersiya sa nagligad nga mga bulan.
Ginapahayag nga naghimbunanay ang duha para sa iligal nga pagtipon kag pag-angkon sang manggad nga ginapatihan nga nakuha sa indi matarong nga paagi. Base sa reklamo, naglab-ot sa ₱56 bilyon ang ginapatihan nga ill-gotten wealth nga natipon halin 2022 tubtob 2025.
Sa amo man nga tion, si Romualdez ang nagaserbe bilang House Speaker, samtang si Co ang chairman sang House Committee on Appropriations.
Ang pag-file sang complaint for preliminary investigation nagakahulugan nga usisaon anay sang Office of the Ombudsman ang mga ebidensya agud mahibaluan kon may nagakaigu nga basehan sa pagpasaka sang pormal nga kaso sa korte batok sa mga ginareklamo.
Sa subong, wala pa sang opisyal nga pahayag sanday Romualdez kag Co angot sa reklamo nga ginpasaka batok sa ila.
Una na nga ginpahayag sang legal team ni Romualdez nga indi ini magpalagyo sa Pilipinas. Wala naman nagpakita si Co diri sa pungsod halin pa sang ginsipa ini sa Kamara bilang kongresista.
