CONCEPCION, ILOILO- Pinal kag opisyal na ang desisyon ni Mayor Raul Banias sang Concepcion, Iloilo nga indi magpapili bilang Presidente sang League of Municipalities of the Philippines (LMP)- Iloilo Chapter.
Sa interview sang Bombo Radyo Iloilo, ginpahayag ni Mayor Banias nga naistorya na niya si Governor Arthur ‘Toto’Defensor Jr. kag si anay Governor Arthur Defensor Sr., tuhoy diri.
Suno kay Banias, apisar madamo na ang naga-endorso sa iya, mas pakamaayuhon niya nga magtutok sa trabaho bilang alkalde sang iya banwa.
Ginpahayag sang alkalde nga luyag niya ibubo ang iya atensyon agud mapa-uswag ang banwa sang Concepcion.
Igatugyan naman ni Banias sa kaupdanan sini sa Liga kun sin-o ang luyag nila iduso bangud madamo pa man sang iban nga alkalde nga bukas kag masarangan ang mangin LMP-Iloilo President.
