Ginhingyo ni Kabataan Party-list Rep. Raoul Manuel kay President Ferdinand Marcos Jr. nga mag-deklarar sang mental health emergency sa pungsod kasunod sang report nga may ginatos ka mga estudyante nga naghikog sang nagligad nga academic year.
Suno sa Ilonggo lawmaker, maga-file siya sang resolusyon sa Kamara agud iduso sa administrasyon nga mag-deklarar sang emergency, kag imbestigaran man ang mental health crisis sa pungsod.
Suno sa Department of Education (DepEd), 404 ka mga estudyante sa bilog nga pungsod ang na-rekord nga nag-suicide kag 2,147 naman ang nag-attempt nga maghikog sang Academic Year 2021-2022.
Kun may yara sang mental health emergency suno kay Manuel, mapasakaan ang budget kag ang suporta sa mental health professionals kag services.
Magluwas diri, ginahingyo man ang maid-id nga review sa education policies ilabi na ang K-to-12.
Una na nga nagpahayag ang DepEd nga siguruhon sini nga ma-access sang mga estudyante ang guidance kag psycho-social services sa mga eskwelahan kag pasakaan ang sweldo sang guidance counselors. ##
