Ginakabalaka ni Iloilo City Councilor Eduardo “Ed” Peñaredondo ang nangin pahayag ni City Health Office Incharge Dra. Annabelle Tang nga wala sang pondo ang syudad sang Iloilo agud ibakal sang alcohol nga kinahanglanon agud malikawan ang paglapta sang COVID-19.
Sa ginpatigayon nga session sa Iloilo City Council, nagpabutyag si Peñaredondo sang pagkabalaka bangud sa nangin pahayag ni Tang.
Bangud sini, nagdonar si Peñaredondo sang P5,000 kag personal niya ini nga hatag sa doktora samtang ginapatigayon ang session.
Gin-athag naman ni Tang ang iya nangin pahayag nga wala sang pondo ang syudad agud ibakal sang mga kinahanglanon agud malikawan ang paglapta sang COVID-19 sa sulod sang Iloilo City Hall.
Suno kay Tang, nakarequest na sila agud makabakal sang alcohol kag iban pa nga disinfectants apang madugay pa ang procurement process.
May kaangtanan diri, nagpasalig naman ni City Budget Officer Ninda Atinado siguraduhon nila ang madasig nga pagprocure sang mga alcohol kag mga disinfectant para sa Iloilo City Government agud malikawan ang COVID-19.
