ILOILO CITY- Natigayon na nga makapasaka sang kaso si Iloilo City Councilor Plaridel Nava sa Office of the Ombudsman batok sa mga opisyal sang Department of Public Works and Highways kag sa International Builders Corporation.
Naglab-ot sa anom ka mga persona ang pormal nga ginpasakaan sang kaso nga paglapas sang Section 3 sang Republic Act 3019 or the Anti-Graft and Corrupt Practices Act.
Ang mga ginpasakaan sang kaso amo sanday anay Department of Public Works and Highways Region VI Director Tiburcio Canlas; DPWH VI Regional Director Nerie Bueno; Asst. Regional Director Jose Al Fruto kag Project Engineer Ormel Santos.
Kabahin sa mga ginpasakaan sang kaso ang mga personalidad sa bahin sang International Builders Corporation nga sanday Helen Edith Lee Tan kag Allen Son Tan.
Magluwas sa Anti-Graft and Corrupt Practices Act, magapangatubang man sang mga kaso nga Gross Neglect of Duty, Grave Misconduct kag Conduct Prejudicial to the Best Interest of Public Service ang mga pangalan nga yara sa affidavit of complaint.
